Review :

ஒரு பழங்காலக் கோயிலுக்குள் பெரும் புதையல் இருக்கிறது. அதைக் கைப்பற்ற சர்வதேசக் கொள்ளைக்கும்பல் திட்டமிடுகிறது. அதற்காக அரசுத் தொல்லியல்த்துறையை சேர்ந்த சில அதிகாரிகளை தங்களுடன் சேர்த்துக்கொண்டு கொள்ளையடிக்கும் நடவடிக்கையில் ஈடுபடும் அவர்களுடைய திட்டம் பலித்ததா? இல்லையா? என்பது தான் படத்தின் கதை.

படத்தில் நாயகனாக நடித்திருக்கும் சிபிராஜ், ஆர்ப்பாட்டம் இல்லாத நடிப்பை கொடுத்திருக்கிறார். தனது கதாபாத்திரத்திற்கு ஏற்ற நடிப்பை வெளிப்படுத்தியிருக்கிறார். 

ஹீரோயினாக நடித்திருக்கும் தன்யா ரவிச்சந்திரன், கமர்ஷியல் நாயகியாக அல்லாமல் கதைக்கு முக்கியத்துவம் உள்ள ஒரு கதாப்பாத்திரமாக படம் முழுவதும் வருகிறார்.

கே.எஸ்.ரவிக்குமார், ஹரீஷ்பேரடி, ராதாரவி, பக்ஸ், மாரிமுத்து உட்பட படத்தில் நிறைய நடிகர்கள். அனுபவ நடிகர்கள் என்பதால் காட்சிகளிலும் அது நிறைந்து படத்துக்குப் பலமாக அமைந்திருக்கிறது.

வில்லத்தனத்தில் அசத்தி இருக்கிறார் ஹரிஷ் பெராடி. தயாரிப்பாளர் அருண் மொழி மாணிக்கம், திரைக்கதை எழுதி முக்கிய கதாப்பாத்திரத்தில் நடித்து கவனத்தை ஈர்த்து இருக்கிறார்.

இளையராஜாவின் இசை படத்திற்கு மிகப்பெரிய பக்க பலமாக அமைந்துள்ளது. பின்னணி இசையில் அதிக ஸ்கோர் செய்திருக்கிறார். ராம் பிரசாத் ஒளிப்பதிவு திரைக்கதை ஓட்டத்திற்கு பெரிதும் உதவியிருக்கிறது.

பழங்கால கோவில்களில் இருக்கும் பொக்கிஷங்கள் மற்றும் அதை பாதுகாக்கும் வழிகளை வியக்கும் வகையில் சொல்லியிருக்கும் இயக்குநர், எதிர்பாராத திருப்பங்கள் மூலம் முழு படத்தையும் சீட் நுணியில் உட்கார்ந்து பார்க்க வைக்கிறார். மேலும் பல வருடங்களுக்குப் பிறகு தமிழ் சினிமாவில் ஆன்மீகத்தை சார்ந்த ஒரு ஆராய்ச்சி திரைப்படம் வெளியாகி இருப்பது மக்கள் மத்தியில் வரவேற்பைப் பெற்றுள்ளது.

"'மாயோன்" படத்திற்கு மதிப்பீடு 3/5

Verdict : ஆன்மீகமும் அறிவியலும் ஒன்றே என்பதை உணர்த்தும் படம்