சற்று முன்
சினிமா செய்திகள்
நல்லதாக நினைத்துக்கொண்டு நான் செய்தவை விஜய்யைப் போய்ச் சேரவில்லை... எஸ்.ஏ.சந்திரசேகர்
Updated on : 02 October 2021
சட்டமன்றத் தேர்தலையொட்டி, நடிகர் விஜய் பெயரில் அவரின் தந்தை எஸ்.ஏ.சந்திரசேகர் கட்சி ஒன்றை ஆரம்பிக்க, இது பிடிக்காமல் விஜய் தன் தந்தையுடன் கோர்ட், கேஸ் என்று மல்லுக்கட்டியது தனிக்கதை. இந்தநிலையில், `உள்ளாட்சித் தேர்தலில், விஜய் மக்கள் இயக்கம் போட்டியிடுகிறது’ என்று வெளியான செய்தி பரபரப்பைக் கூட்டியது.
இப்போது அடுத்த அதிரடியாக, `விஜய் மக்கள் இயக்கத்தைக் கலைத்துவிட்டேன்' என எஸ்.ஏ.சந்திரசேகர் தரப்பும், `விஜய் மக்கள் இயக்கம் கலைக்கப்படவில்லை' என்று விஜய் தரப்பும் மாறி மாறிச் சொல்லிவருகின்றனர். நடிகர் விஜய்யை முன்வைத்து அரங்கேறிவரும் இந்த அரசியல் குறித்துப் பேசுவதற்காக இயக்குநர் எஸ்.ஏ.சந்திரசேகரை சந்தித்துப் பேசியபோது:
``விஜய்யை, நடிகர் விஜயாக உருவாக்கியதில் உங்கள் பங்கு என்ன?''
''திரைப்படங்கள் பார்க்கக்கூட அனுமதிக்காத ஒரு குடும்பத்தில் பிறந்து வளர்ந்து, பின்னாளில் திரைப்பட இயக்குநராகவே வாழ்க்கையை வடிவமைத்துக்கொண்டவன் நான். அந்தக் காலகட்டத்தில், குடும்பத்தினரின் எதிர்ப்பையும் மீறி 'பராசக்தி', 'மனோகரா' என நான் பார்த்த திரைப்படங்கள், திராவிட மேடைகளில் நான் கேட்ட தலைவர்களின் பேச்சுகள் இயல்பாகவே எனக்குள், சமூக அக்கறையையும் திரைத்துறை ஆசையையும் ஒருசேர வளர்த்துவிட்டன.
என்னுடைய ஜீன், என் மகன் விஜய்க்கும் இருக்கும் அல்லவா... எனவே, அவருக்கும் இயல்பாகவே நடிப்புத்துறை மீது ஆர்வம் வந்தது. ஒரு தகப்பனாக நானும் பல்வேறு சிரமங்கள், அவமானங்களைக் கடந்து விஜய்யை ஒரு நடிகராக வளர்த்துவிட ரொம்பவே சிரமப்பட்டேன்!''
''தமிழ்த் திரையுலகின் உச்ச நடிகரான விஜய், இப்போது ஏன் அரசியலுக்குள் வர வேண்டும் என ஆசைப்படுகிறீர்கள்?''
''தமிழ் சினிமாவின் உச்ச நடிகராக வலம்வரும் விஜய், இப்போது அரசியலுக்குள் அடியெடுத்துவைத்தால், அவரது திரை வாழ்வு கெட்டுப்போகும்தான். ஏனெனில், எம்.ஜி.ஆர் காலத்தில் இருந்ததுபோல் இன்றைக்கு மக்கள் இல்லை... ' அரசியலுக்கு வந்தால், சினிமாவை விட்டுவிட்டு வா' என்று நிச்சயம் கேள்வி கேட்பார்கள். 'நடித்துக்கொண்டிருக்கும்போதே திடீரென்று அரசியலுக்கு வருகிறீர்கள்... அப்புறம் `பிக் பாஸ்’ நிகழ்ச்சி நடத்துகிறீர்கள்... மறுபடியும் அரசியல் பேசுகிறீர்கள்' என்றெல்லாம் கமல்ஹாசனை மக்கள் கேட்டார்கள்தானே!
அதனால்தான், 'விஜய் மக்கள் இயக்க'த்தை அரசியல் கட்சியாக நான் அறிவித்தபோது, இது குறித்து யாரேனும் கேட்டால்கூட, 'அப்பா ஆரம்பித்து நடத்துகிறார்.... மற்றபடி எனக்கும் கட்சிக்கும் எந்தத் தொடர்பும் இல்லை' என்று கூறிவிட்டு விஜய், தனது திரைவாழ்க்கையில் மட்டும் கவனம் செலுத்த வேண்டும்; அரசியல் இயக்கத்தை நாம் நடத்திச் செல்ல வேண்டும் என்றெல்லாம்தான் நானும் நினைத்தேன். எப்படியும் 2026 அல்லது அதற்கடுத்த தேர்தலில் விஜய் அரசியலுக்கு வரத்தான் போகிறார். எனவே, இப்போதே விஜய்க்கான ஒரு வலுவான அடித்தளத்தை அரசியலில் அமைத்துவிட வேண்டும் என்று நான் ஆசைப்பட்டேன்.... அவ்வளவுதான்!''
''ஆனால், உங்களுக்கு எதிராகவே விஜய், வழக்கு தொடுத்துவிட்டாரே?''
''தாய், தந்தைக்கு ரொம்பவும் மரியாதை கொடுக்கக்கூடியவர் விஜய். எனவே, அவராக இந்த வழக்கைத் தொடுத்திருக்க மாட்டார். அவரைச் சுற்றியிருந்தவர்கள்தான் அவரைத் தூண்டிவிட்டு வழக்கு தொடுக்கவைத்திருக்கிறார்கள். ஏற்கெனவே கோபத்தில் இருந்த விஜய்யும் கையெழுத்து மட்டும் போட்டியிருப்பார். மற்ற விஷயங்களையெல்லாம் வழக்கறிஞர்களே எழுதிக்கொண்டிருப்பார்கள். விஜய் முழு மனசோடு எங்கள் மீது வழக்கு தொடுத்திருக்க வாய்ப்பில்லை. எனவே நாங்களும் இது குறித்துப் பெரிதாக எடுத்துக்கொள்வதில்லை.''
''உங்களது நல்ல நோக்கத்தை, விஜய் புரிந்துகொள்ளவில்லையா?''
''ஆரம்பத்தில், ஒரு நடிகனாக விஜய் மிளிர்வதற்கு ஒரு தகப்பனாக நான் என்னென்ன முயற்சிகளைச் செய்தேனோ... அதேபோல், அடுத்தகட்டமாக அரசியலிலும் விஜய் அடியெடுத்து வைப்பதற்கான என் கடமையைச் செய்துவிட வேண்டும் என்றுதான் ஆசைப்பட்டேன். அந்தவகையில், 'நம்ம பிள்ளை நன்றாக இருக்க வேண்டும்' என்ற ஆசையில், ஒரு தந்தையாக உரிமை எடுத்துக்கொண்டுதான் அரசியல் இயக்க அறிவிப்பை வெளியிட்டேன்!
ஆனால், நல்லதாக நினைத்துக்கொண்டு நான் செய்தவை விஜய்யைப் போய்ச் சேரவில்லை... அல்லது அவருக்கே இது புரியவில்லையா என்பதும் எனக்குத் தெரியவில்லை. அதனால்தான், விஜய் மக்கள் இயக்கம் அரசியல் கட்சியாகிறது என்று நான் அறிவிப்பதே அவரது பெயரை பாதிப்பதாக நினைத்துக்கொண்டு மறுப்பு அறிக்கை வெளியிட்டுவிட்டார். அடுத்து அம்மா, அப்பா உட்பட கட்சியின் நிர்வாகிகள் 11 பேர் மீது வழக்கும் தொடர்ந்துவிட்டார்!''
''இப்போது உங்கள் நிலைப்பாடு என்ன?''
''எனக்கு இப்போது அரசியலில் ஆர்வமே இல்லை. ஏனெனில், கடந்த சட்டமன்றத் தேர்தலுக்கு முன்பாக, தி.மு.க - அ.தி.மு.க என இந்த இரண்டு திராவிடக் கட்சிகள் மீதும் மக்களிடையே ஒருவித வெறுப்பு இருந்தது. எனவே, யாராவது ஒரு புதிய நபர் சமூக நோக்கத்தோடு அரசியலுக்கு வர மாட்டாரா என்று மக்களும் எதிர்பார்த்திருந்தனர். இதைத்தான் 'வெற்றிடம்' என்றும் சொல்லிக்கொண்டேயிருந்தனர்.
இன்றைக்கு வரை நான் அரசியல் பேசிவந்தாலும், நான் அரசியல்வாதி இல்லை. ஆனால், எனக்கும் ஓரளவு அரசியல் தெரியும். அதனால்தான் இதுதான் சரியான சமயம் என்றெண்ணி கட்சியை ஆரம்பித்தேன். அன்றைக்கு விஜய் மறுப்பு தெரிவிக்காமல் இருந்திருந்தால், அதனுடைய பலன் வேறுவிதமாக இருந்திருக்கும். தைரியமாகவே சொல்கிறேன்... 'விஜய் மக்கள் இயக்கம்' இன்றைக்கு எதிர்க்கட்சி வரிசையிலேயே அமர்ந்திருக்கும். அந்த அளவுக்கு கட்சியின் அடிப்படைக் கட்டமைப்பை தயார் செய்துவைத்திருந்தேன்.
ஆனால், தேர்தலுக்குப் பிந்தைய இன்றைய சூழலில், எல்லாமே மாறிவிட்டன. 'தி.மு.க பழையநிலையிலேயே ஆட்சி செய்வார்கள்' என்ற நமது நினைப்பையெல்லாம் பொய்யாக்கிவிட்டார்கள். முதல்வர் மு.க.ஸ்டாலின், ரொம்பவும் மெச்சூர்டாக, பக்குவப்பட்ட அரசியல்வாதியாக திறம்பட ஆட்சி செய்துவருகிறார். உண்மையைச் சொல்ல வேண்டுமானால், அரசியல் நிர்வாகத் திறனில், கலைஞரையும்விட ஒருபடி விஞ்சிவிட்டார் ஸ்டாலின் என்றே சொல்ல வேண்டும். இப்படி எல்லாமே நல்லபடியாக நடந்துகொண்டிருக்கும் இந்தச் சூழலில், 'இன்னொரு புதிய கட்சி தேவையா..?' என்று நினைக்கிற நிலைக்கு மக்கள் வந்துவிட்டனர். பசியோடு இருக்கும்போது, பழைய கஞ்சி சாப்பிட்டால்கூட பிரியாணி சாப்பிட்ட திருப்தி கிடைக்கும். ஆனால், இன்றைக்கு வயிறு நிறைய பிரியாணி சாப்பிட்ட திருப்தியில் மக்கள் இருக்கும்போது, பழைய கஞ்சியை யார் விரும்புவார்கள்?''
''விஜய், பேரன், பேத்திகளுடனான உங்கள் குடும்ப உறவு எப்படியிருக்கிறது?''
''இன்றைக்கும் விஜய்யோடு நான் அரசியல் விஷயங்களைப் பற்றித்தான் பேசிக்கொள்வதில்லையே தவிர, எங்கள் பேரன் - பேத்தியுடனான எங்கள் குடும்ப உறவு நன்றாகத்தான் இருக்கிறது. சிறுவயதுப் பிள்ளைகளாக இருந்தபோது கொஞ்சி விளையாடுவோம். இப்போது என் பேரன், விஜய்யைவிடவும் பெரிய ஆளாக வளர்ந்துவிட்டான். லண்டனில் படித்துக்கொண்டிருக்கிறான். அதனால், போனில்தான் பேசிக்கொள்கிறோம். பேத்தி மட்டும் சென்னையில் இருக்கிறாள். எனக்கும் விஜய்க்கும் இடையேயுள்ள பிரச்னையில், பேரன், பேத்திக்கு எந்தவிதச் சம்பந்தமும் கிடையாது என்பதால், எங்கள் உறவு நன்றாகத்தான் இருக்கிறது.
எங்களுடைய கல்யாண நாள், விஜய்யின் கல்யாண நாள் போன்ற நல்ல நாள்களில் ஏதாவதொரு ஹோட்டலில் குடும்பத்தோடு எல்லோரும் ஒன்றுகூடி கொண்டாடுவோம். ஆனால், அதுவும்கூட இப்போது இல்லை...''
''அரசியலில் ஈடுபடுவதற்கு விஜய்க்கு ஆர்வம் இல்லையா அல்லது அவரது பார்வையில் 'இப்போது அரசியல் தேவையில்லை' என்று நினைக்கிறாரா....?''
''விஜய்க்கு சமூக அக்கறை இருக்கிறது. அதனால்தான் பாதிக்கப்பட்டவர்களுக்காக நிறைய உதவிகள் செய்கிறார். சமூக நடப்புகளை உன்னிப்பாக கவனிக்கிறார். ஆனால், அரசியல் அக்கறை அவருக்கு இருக்கிறதா, இல்லையா என்று எனக்கு சொல்லத் தெரியவில்லை. எனவே, இதை நீங்கள் அவரிடம்தான் கேட்க வேண்டும்!
அதேசமயம், என்னைப் பொறுத்தவரையில் நான் நடிகர் விஜய்யின் அப்பா மட்டுமில்லை. 80-92 வரையிலாக இந்தி உட்பட பல மொழிகளிலும் படங்கள் இயக்கியிருக்கிறேன். புரட்சி இயக்குநர் என்ற பெயரும் இருக்கிறது. இந்தச் சூழலில், எனக்கென்றும் தனிப்பட்ட விருப்பு, வெறுப்புகள் உண்டுதானே. அந்த உணர்வுகளுக்கு விஜய்யும் மதிப்பு கொடுக்க வேண்டும்தானே?
விஜய்க்குத் திருமணம் முடிந்தவுடனேயே, அவரது அடையாளம், அங்கீகாரத்தைப் பாதுகாக்கும் வகையில் தனிக்குடித்தனம் வைத்தேன். இதேபோல், `அப்பாவுக்கும் தனிப்பட்ட அபிப்ராயங்கள் இருக்கின்றன... அதை அவர் சொல்லலாம்' என்று விஜய்யும் நினைத்திருக்க வேண்டும், நினைக்க வேண்டும் என்றெல்லாம் நான் ஆசைப்பட்டேன்!''
''விஜய் மக்கள் இயக்கம் என்ற பெயரில், நீங்கள் பணம் வசூல் செய்ததாகவெல்லாம் ஊடகச் செய்திகள் வெளியாகினவே?''
''இது அப்பட்டமான பொய்ச் செய்தி. விஜய் பெயரைச் சொல்லி இத்தனை கோடிகளை வாங்கிவிட்டதாக ஒரு குற்றச்சாட்டு என் மீது உண்டா? என்னுடைய கடின உழைப்பால்தான் நான் இன்றைக்கு இந்த இடம்வரைக்கும் உயர்ந்திருக்கிறேன்.
இன்றைய சமூக ஊடக உலகில், யார் வேண்டுமானாலும் எந்தப் பொய்யை வேண்டுமானாலும் ஒரு நொடியில் பரப்பிவிட முடியும் சார்... இதெல்லாம் வதந்தி! சந்திரசேகர் கோபக்காரன், நியாயமானவன், நேர்மையானவன், யாரையும் ஏமாற்றாத நல்ல வியாபாரி. 50 ஆண்டுக்கால திரை வாழ்க்கையில் நான் சம்பாதித்துள்ள சொத்து இவை மட்டும்தான். எனவே, நான் பணம் வாங்கியதாக நீங்கள் சொல்வதை யாரும் நம்ப மாட்டார்கள். விஜய் ரசிகர்களே நம்ப மாட்டார்கள்!
இன்றைக்கு யார் நினைத்தாலும் உடனே ஒரு யூடியூப் சேனல் ஆரம்பித்துவிட முடியும். எனவே, என்னைப் பிடிக்காத ஒருசிலர், இது போன்ற பொய்யான செய்திகளைப் பரப்பிவிடுகிறார்கள்.''
''விஜய்யுடன் உங்களுக்கு முரண் ஏற்படுகிற நிலையை யார் ஏற்படுத்தியதாக நினைக்கிறீர்கள்?''
''விஜய்யும் நானும் நன்றாகப் பேசிக்கொண்டிருக்கும் சூழலிலேயே, வாரத்துக்கு ஒருமுறை அல்லது 10 நாள்களுக்கு ஒரு முறைதான் நேரில் பேசிக்கொள்வோம். மற்ற நேரங்களில் தொலைபேசி வழியே மட்டும்தான் பேசிக்கொள்வோம். ஆனால், 12 மணி நேரமும் விஜய்யுடனேயே சுற்றியிருப்பவர்கள் ஒருசிலர்.... அவர்கள்தான் விஜய்யை தவறாக வழிநடத்திவிட்டனர்.
குறிப்பாக, விஜய் மக்கள் இயக்கத்துக்குள் என்னால் அழைத்துவரப்பட்ட புஸ்ஸி ஆனந்த், அரசியவாதிகளுக்கே உரிய பண்பை வெளிக்காட்டிவிட்டார். அவரது அந்த நியாயமான பண்பை எப்படிச் செயல்படுத்த வேண்டுமோ அப்படிச் செயல்படுத்திவிட்டார்.
ஆனால், தகப்பன்களுக்கு எப்போதுமே `ஜால்ரா' போடத் தெரியாது. அதனால், விஜய் ஏதேனும் தவறு செய்தால், உடனடியாகச் சுட்டிக்காட்டி திருத்தம் சொல்வோம். 'இல்லப்பா... நீ செய்தது தவறு' என்று அக்கறையோடு எடுத்துச்சொல்வோம். ஆனால், விஜய்யைச் சுற்றி இருப்பவர்களோ, தங்கள் சுயநலத்துக்காக விஜயை எப்போதும் பாராட்டிக்கொண்டே மட்டும் இருப்பார்கள்.
இன்னொரு விஷயத்தையும் சொல்லியாக வேண்டும். அதாவது, மேலும் மேலும் வெற்றிமேல் வெற்றி கிடைத்துவரும்போது, மனிதனுக்கு ஒருவித மயக்கம் வரும்! இது விஜய்க்கு மட்டுமல்ல.... மனிதர்கள் எல்லோருக்குமான பொதுவான விதி! ஆனால், 'இதெல்லாம் தவறு' என்று விஜய் மயக்கம் தெளிந்து உணர்ந்து தெரிந்துகொள்வதற்கு கொஞ்சம் நேரம் எடுத்துக்கொள்ளும். எனவே, 'என் தந்தை எனக்குத் தவறு செய்ய மாட்டார்' என்ற புரிதல் இப்போது விஜய்க்கு வராது... அப்படியொரு புரிதல் ஏற்படும் வாய்ப்பையும் அவரைச் சுற்றியிருப்பவர்கள் தர மாட்டார்கள். அதனால்தான் தந்தை - மகன் இடையேகூட இந்த இடைவெளி!''
''இந்த வேதனையிலிருந்து எப்படி மீண்டுவரப் போகிறீர்கள்?''
''இது வலியே இல்லை சார்.... நானும் என் மனைவியும் எப்போதுமே மகிழ்ச்சியான ஆட்கள். 'என் மகன் விஜய், என் சொல்பேச்சு கேட்கவில்லையே' என்று ஏங்குவதைவிட `இது யதார்த்தம்' என்று ஏற்றுக்கொண்டு போய்விடுவேன். காரணம், இது எல்லோரின் வீடுகளிலும் நடப்பதுதான். 50,000 ரூபாய் சம்பளம் வாங்கிவிட்டாலே, அப்பன் பேச்சைக் கேட்காமல் அப்படியே தூக்கிப் போட்டுவிடுகிற பிள்ளைகள் இங்கே இருக்கிறார்கள்தானே!
அத்தனை மொழிகளிலுள்ள சூப்பர் ஸ்டார்களையும் வைத்து நான் படம் பண்ணிவிட்டேன். போதும் என்ற அளவுக்கு சம்பாதித்துவிட்டேன்... இப்போதும்கூட படம் இயக்குகிறேன், நடிக்கிறேன். எனவே, இன்று வரையிலும் பொருளாதார உதவி என்று யாரையும் நம்பி நான் இல்லை! எனவே, எனக்கு இது பற்றியெல்லாம் ஒருதுளி வலிகூட இல்லை!''
சமீபத்திய செய்திகள்
‘டாக்ஸிக் காதல்’ பாடலை வெளியிட்ட பிக்பாஸ்’ புகழ் அர்ச்சனா
ஆத்மாவை வருடும் உணர்ச்சிகரமான இசை படைப்புகளால் பரவலாக அறியப்படும் தமிழ்நாட்டின் பிரபல இசையமைப்பாளர் அருண்ராஜ், ‘பிக்பாஸ்’ புகழ் அர்ச்சனா ரவிச்சந்திரனுடன் இணைந்து, சமீபத்தில் அவர்களின் புதிய பாடலான ‘டாக்ஸிக் காதல்’-ஐ வெளியிட்டுள்ளனர். அதீத எதிர்பார்ப்புகள் நிறைந்த இந்த பாடல், நவீன காதல் உறவுகளின் சிக்கல்களை உணர்ச்சிகரமான மெலோடிகள் மற்றும் தைரியமான பாடல்வரிகளின் கலவையால் விவரிக்கிறது.
‘டாக்ஸிக் காதல்’ என்ற இந்த பாடல், காதல் சில நேரங்களில் ஏற்படுத்தக்கூடிய இருண்ட, தீவிரமான மற்றும் மாறும் உணர்வுகளை ஆழமாக வெளிப்படுத்துகிறது. தடம், எறும்பு, பிஸ்ஸா-3, பைரி போன்ற வெற்றி பெற்ற திரைப்படங்களுக்கு இசையமைத்து ரசிகர்களின் இதயங்களை வென்ற அருண் ராஜ், இந்த பாடலுக்கு புதிதாகவும் இதற்கு முன் கண்டிராத இசை வடிவத்தையும் கொண்டு வந்துள்ளார். பாரம்பரிய இசை கூறுகளை நவீன இசைத்துடிப்புடன் கலந்து இசையமைப்பது என்பது அவருக்கு கை வந்த கலை, இதனால் ‘டாக்ஸிக் காதல்’ இன்றைய இசைத்துறையில் தனித்துவமாக திகழ்கிறது.
இந்த பாடலின் மேலும் ஒரு சிறப்பு அம்சம் என்னவென்றால், ‘பிக்பாஸ்’ வீட்டில் இருந்த காலத்தில் அனைவருக்கும் பரிச்சயமான அர்ச்சனா ரவிச்சந்திரனின் பங்களிப்புதான், அவரின் பல்வேறு திறமைகளை வெளிப்படுத்தி, இந்த பாடலில் தன் குரலால் மெருகூட்டியுள்ளார். அவரது சிறந்த ஆளுமை மற்றும் ஆழமான உணர்ச்சி வெளிப்பாடு பாடலின் ஆழத்தை அதிகரித்து, காதலினால் ஏற்றத்தாழ்வுகளை அனுபவித்த அனைவரும் தங்களை எளிதில் தொடர்பு படுத்தி கொள்ளக் கூடிய பாடலாக இது மாறுகிறது.
இந்த புதிய கூட்டணியைப் பற்றி அருண் ராஜ் கூறுகையில், "டாக்ஸிக் காதல் என் மனதுக்கு மிகவும் நெருக்கமான ஒரு படைப்பாகும். இந்த பாடலில் உள்ள உணர்வுகள் மிகவும் இயல்பானதும் உண்மையானதுமானவை, அதனால் அந்த உறவின் தீவிரத்தை இசையில் பிரதிபலிக்க வேண்டும் என்று நினைத்தேன். அர்ச்சனாவுடன் பணிபுரிவது அருமையான அனுபவமாக இருந்தது, நாங்கள் உண்மையில் ஒரு தனித்துவமான படைப்பை உருவாக்கியுள்ளோம் என்று நம்புகிறேன்" என்றார்.
அர்ச்சனா ரவிச்சந்திரனும், "அருண் இந்த படைப்புக்காக என்னை அணுகியதும், ‘டாக்ஸிக் காதல்’ என்ற கரு என்னை உடனடியாக கவர்ந்துவிட்டது. இது நம்மில் பலருக்கும், குறிப்பாக 'ஜென்-ஸீ'(Generation-Z) என்றழைக்கப்படும் இந்த தலைமுறையினருடன் தொடர்புடையது, மேலும் இந்த இசைப் பயணத்தில் நான் பங்கேற்பது அந்த உணர்வுகளை புதிய வழியில் வெளிப்படுத்த வழிவகுக்கிறது. நாங்கள் உருவாக்கியதை அனைவரும் கேட்க வேண்டும் என்று ஆவலுடன் எதிர்பார்க்கிறேன்" என்று கூறினார்.
இந்த பாடலின் இசைக் காணொளி டிப்ஸ் இசை நிறுவனத்தின் மூலம் தயாரிக்கப்பட்டுள்ளது. பாடலின் கருப்பொருளுக்கு ஏற்ற காட்சிகளுடன் டாக்ஸிக் காதல் இப்போது அனைத்து முக்கிய இசை ஸ்ட்ரீமிங் தளங்களில் வெளியாகியுள்ளது.
ஏஆர்ஆர் திரைப்பட நகரம்
சென்னையில் உள்ள ஏ ஆர் ஆர் (ARR) ஃப்லிம் சிட்டியில் யூஸ்ட்ரீம் (uStream) என்ற பெயரில் அதிநவீன வசதிகளை கொண்ட மெய்நிகர் தயாரிப்புக் கூடம் (Virtual Production Studio) இந்தியா மற்றும் உலகெங்கும் இருந்து வந்திருந்த 500க்கும் மேற்பட்ட திரையுலகப் பிரமுகர்கள் முன்னிலையில் செப்டம்பர் 22 அன்று தொடங்கப்பட்டது.
முழுமையான தொழில்நுட்பப் பணிகளை வழங்கும் uStream, ஆஸ்கர் விருது வென்ற இசையமைப்பாளர் A.R. ரஹ்மான் மற்றும் தொழில்துறை முன்னோடி ஸ்ரீதர் சந்தானம் கூட்டணியில் உருவாகியுள்ளது. இந்திய சினிமாவின் புதிய யுகத்தை வரவேற்க வழிவகுப்பதாய் இது வடிவம் எடுத்திருக்கிறது.
தொடக்க விழாவில் தொழில்துறை தலைவர்களின் கருத்தாழம் மிக்க உரைகள் இடம்பெற்றன. சிஜி ப்ரோவைச் சேர்ந்த எட்வர்ட் டாசன் டெய்லர், மெய்நிகர் தயாரிப்பில் தனது நிபுணத்துவத்தையும், எதிர்காலத் திரைப்படத் தயாரிப்பை மாற்றி அமைக்கும் தொழில்நுட்ப திறனையும் பகிர்ந்து கொண்டார்.
Dimension5 ஐச் சேர்ந்த இயன் மெசினா திரைப்படத் தயாரிப்பில் செயற்கை நுண்ணறிவின் அற்புதமான பயன்பாடுகளைப் பற்றி எடுத்துரைத்தார். இந்த நிகழ்வின் சிறப்பம்சமாக, பிரபல இயக்குநர் மணிரத்னம் கலந்து கொண்டு, UStream-ன் புதுமையான திறன்கள் மீதான தனது ஆர்வத்தை அவர் வெளிப்படுத்தினார்.
ஏ.ஆர்.ரஹ்மான் தனது தொடக்க உரையில், "கலை மற்றும் தொழில்நுட்பம் உயர் மட்டத்தில் சங்கமிக்கும் இடமாக UStream அமைந்துள்ளது. UStream மூலம் இந்தியக் கதைசொல்லலை உலகளாவிய பார்வையாளர்களுக்கு கொண்டு செல்ல முடியும். தயாரிப்பாளர்கள் மற்றும் இயக்குநர்களுக்கு தொழில்நுட்பத்தை மட்டுமில்லாமல், புதிய வாய்ப்புகளையும் அளிப்பதும் இதன் நோக்கம் ஆகும்," என்றார்.
ஸ்ரீதர் சந்தானம் பேசுகையில், "UStream என்பது வெறும் ஸ்டுடியோ அல்ல; இது இந்தியத் திரைப்படத் தயாரிப்பில் புரட்சியை ஏற்படுத்தும் புதுமைக்கான மையம். சென்னையில் உள்ள திரைப்படத் தயாரிப்பாளர்கள் மற்றும் இயக்குநர்களை சர்வதேசத் தரத்தை அடையச் செய்வதே எங்கள் குறிக்கோள்," என்று கூறினார்.
வியப்பூட்டும் LED திரை அமைப்புகள் கொண்ட இந்த ஸ்டூடியோவில், கலைஞர்கள் கணினி காட்சியமைப்புகளுடன் கற்பனை செய்ததை, நேரடியாக அந்தக்கணத்திலேயே கண் முன் காட்சிப்படுத்த முடியும். இந்த நவீன டிஜிட்டல் நுட்பத்தைக் உலகப்பதிவுகள், அக்கணத்தின் கற்பனைக்காட்சிப்படுத்துதல், செயல்திறன் பதிவு, பல மெய்நிகர் காட்சிகளை ஒருங்கிணைத்துச் செயல்படுத்தும் simulcam நுட்பம், கேமராவினுள்ளேயே செயல்படுத்தப்படும் தொழில்நுட்பங்கள் (ICVFX) கொண்டு உலகின் மெய்நிகர் தயாரிப்புத்துறையில் முன்னணியில் இருக்கிறது uStream.
நவீன அம்சங்கள் மற்றும் விரிவுபடுத்தக்கூடிய கட்டமைப்பு
1.9 பிக்சல் தடத்திற்கு உட்பட்ட முதன்மையான LED சுவர் 40 அடி நீளமும், 20 அடி உயரமும் கொண்டது. நேரடி 3D சூழல்களுக்காக வடிவமைக்கப்பட்ட அதிவேகத் துல்லியமான ரெண்டர் (Render) கட்டமைப்பு. 7,000 சதுர அடி பரப்பளவுடைய ஸ்டூடியோ.
விரிவான கேமரா டிராக்கிங் அமைப்பு, காட்சிகளுக்கு ஏற்ற ஒளியமைப்பைப் பெறுதல், படக்காட்சிகளின் தரவுகளை உடனுக்குடன் பதிவேற்றுதல், உயர்தரப் படக்காட்சிகள் மற்றும் நிறக்கட்டமைப்புகளை விரைவாக, விருப்பத்திற்கு ஏற்ற முறையில் செயல்படுத்தும் வசதி. ஸ்டூடியோவை 20,000 சதுர அடிக்கு விரிவுபடுத்தும் திட்டம்.
படத்தயாரிப்பாளர்களுக்காக, தொடக்கம் முதல் நிறைவு வரை ஒருங்கிணைந்த தயாரிப்புத் தீர்வுகளை வழங்குதல்.படப்பிடிப்பிலிருந்து, எடிட்டிங் & இறுதிப்பணி வரை சீராகச் செயல்படும் உட்புற (on-site) படப்பிடிப்பிற்குப் பின்பான தயாரிப்பு அறைகள்.
விரிவுபடுத்தக்கூடிய ரெண்டர் (render) கணினிகள், மிகக்கடினமான காட்சியமைப்புகளையும் எளிதாகக் கையாள்கிற வகையில் வடிவமைக்கப்பட்ட கணிப்பொறிகள். மொபைல் LED பக்கச்சுவர்கள், நகர்த்தக்கூடிய LED வான்முக விளக்குகள் (Sky light) மற்றும் முழுமையாக ஒருங்கிணைக்கப்பட்ட கேமரா-டிராக்கிங் அமைப்புகள். இதனால் இலகுவாகும் படத்தயாரிப்பு. திரைத்துறையின் தொலைநோக்குப்பார்வையைக் கொண்டு இயங்கும் பொறியியல் பணிமனை, தயாரிப்பு பணிச்சூழல், தயாரிப்பின் ஒவ்வொரு கட்டத்திற்கும் ஆதரவான உபகரணக் களஞ்சியம். உடனடி கூட்டுச்செயல்பாட்டிற்காக இணைக்கப்பட்டுள்ள ஒருங்கிணைந்த இணையப்பதிவேற்றச் சேமிப்பு (Cloud-Integrated Workflow) தொழில்நுட்பத்தை முன்னிலைப்படுத்துதல். உலகின் எந்த மூலையில் இருப்பினும், படத்தயாரிப்பாளர்கள் அன்றாடம் பதிவேற்றும் வீடியோ காட்சிகளை உடனடியாக அணுகக்கூடிய, 'காமிராவிலிருந்து இணையச்சேமிப்பு' (camera-to-cloud) என்ற புதியதொரு தொழில்நுட்பத்தை உருவாக்குதல். முழுமையான ஒருங்கிணைந்த இணைய அமைப்பு, தயாரிப்பு காலக்கெடுக்களை விரைவுபடுத்தி, இயக்குநர்கள், படத்தொகுப்பாளர்கள், VFX குழுக்கள், மற்றும் படப்பதிவிற்குப் பிந்தைய தயாரிப்பு விற்பனையாளர்களுக்கு நேரடி ஒத்துழைப்பைச் சாத்தியமாக்குதல். ஸ்டூடியோவின் இணைய அடிப்படையிலான VFX மற்றும் தயார்நிலை காட்சிகள் அமைப்பு வழியாக மேம்பட்ட தீர்வை வழங்குகுதல்.
காட்சிகள், கோப்புகள் மற்றும் காட்சிப்படிமங்களின் பரிமாற்றத்தின் போது ஏற்படும் தாமதங்களை கணிசமாகக் குறைத்து, திரைப்படக்குழுவின் தயாரிப்புத் திறனை மேம்படுத்துதல் பல்துறை தயாரிப்பு இடங்கள் (Versatile Production Spaces)
திரைக்கலைஞர்களின் பல்வேறு படைப்பாற்றல் தேவைகளைப் பூர்த்தி செய்யும் வகையில் சிறப்பாக உருவாக்கப்பட்ட மெய்நிகர் இடம் தேடல் பகுதி, தொழில்நுட்பத்தேடல் பகுதி, VIP பார்வையிடல் பகுதி, மேம்பட்ட செயல்திறன் பதவிற்கான பகுதிகள், சிமுல்கேம் கட்டமைப்புகள். இயக்குநர்கள், நிர்வாகிகள், விருந்தினர்கள் படப்பிடிப்பின் போதே முன்வரிசையில் அமர்ந்து நேரடியாகக் காட்சிகளை காணும் சாத்தியம் மினியேச்சர் ஸ்கேனிங், மினியேச்சர் 3D பிரிண்டிங், காஸியன் ஸ்பிளாட்டிங் தொழில்நுட்பங்களையும் (Gaussian splatting) விரைவில் வழங்குதல். வீடியோக்களில் இருந்து குறைந்த படங்கள் அல்லது கையிருப்பு அசாதாரணமான உண்மை சார்ந்த 3D காட்சிகளை உருவாக்குதல். சென்னையின் மையத்தில் உள்ள இரண்டாவது, சிறிய LED மேடையும் நிகரான உயர்தொழில்நுட்ப வசதிகளை கொண்டிருக்கிறது. இந்தக்கூடுதல் வசதி குறுகிய வடிவ உள்ளடக்கங்கள், இசை வீடியோக்கள், மற்றும் நிறுவனப்படப்பிடிப்புகளைப் பூர்த்தி செய்யும். அனைத்துத் தரப்பட்ட தயாரிப்புத் திட்டங்களையும் ஆதரிக்கக் கூடியது. சிறந்த திறன் மற்றும் புதுமைக்கான உலகளாவிய கூட்டுச்செயல்பாடுகள் இந்தியாவில் மெய்நிகர் தயாரிப்பின் தரத்தை உயர்த்துதல். உலகின் முன்னணி கணினி காட்சி (visual effects) மற்றும் கைவினை நுட்பங்களை கொண்ட AL தொழில்நுட்ப நிறுவனங்களுடன், பன்னாட்டு வழிநடத்துர்களுடன், பங்குதாரர்களுடன் வகுத்த யுத்திகளைச் செயல்படுத்துதல். CG Pro நிறுவனம், உலகளாவிய திறமைகளை அறிமுகப்படுத்துவதுடன் VFX துறையில் நவீனப் பயிற்சியையும் வழங்குவது.
Vu, Dimension5, Cuberic போன்ற திரைப்படத்தொழில்நுட்ப நிறுவனங்கள் AI மூலம் உருவாக்கப்படும் பின்னணிகளைக் கொண்டு உள்ளூர்த்தயாரிப்புகளின் தரத்தையும் படைப்பாற்றலையும் பன்னாட்டுத்தரத்திற்கு உயர்த்துவதை உறுதிசெய்தல்.
உலகளாவிய ஸ்டூடியோக்கள் மற்றும் VFX கலைஞர்களுடன் நெருங்கிய தொடர்புகளை மேற்கொண்டு, இந்திய திரைப்படத்தயாரிப்புகளின் தரத்தை மேம்படுத்துவதில் தீவிரமாகச் செயல்படுதல்.
ARR ஃபிலிம் சிட்டி: ஏஆர்ஆர் திரைப்பட நகரம் - உலகளாவிய தயாரிப்புகளுக்கான ஒரு கலைத்துறை மையம்
சென்னையின் அருகில் 100 - ஏக்கர் பரப்பளவில் அமைந்த ARR ஃபிலிம் சிட்டி, உள்ளூர் மற்றும் சர்வதேசத்தயாரிப்புகளுக்கான சிறந்த சூழலை வழங்குகிறது. uStream - ஸ்டூடியோவின் உயர்தொழில்நுட்ப மெய்நிகர் தயாரிப்பு மேடையைத் தவிர, ARR ஃபிலிம் சிட்டி, இசையமைப்பாளர் A.R. ரஹ்மான் அவர்களால் தனிப்பட்ட முறையில் வடிவமைக்கப்பட்ட உலகத்தரத்திலான இசைப்பதிவு, தயாரிப்புக் கூடத்தையும் கொண்டிருக்கிறது. பாரம்பரிய திரைப்படத்தயாரிப்பு, படப்பிடிப்பு அரங்க உருவாக்கத்திற்குப் பொருத்தமான இரண்டாவது மேடை மற்றும் பல அளவிலான தயாரிப்புக் குழுக்களுக்கான தனிப்பட்ட வசதிகளையும் கொண்டிருக்கிறது. திரை இயக்குநர்கள் தங்கள் படைப்பாக்கத் திட்டங்களில் முழுமையான கவனம் செலுத்துவதற்கு வழிவகுக்கிறது, இந்தக் கலைமையம். அதே நேரத்தில் சிறந்த தரமான வசதிகளை ஒரே இடத்தில் பயன்படுத்தும் வாய்ப்பையும் வழங்குகிறது.
தொழில்நுட்பம், படைப்பாற்றல், ஒத்துழைப்பு, கூட்டு உழைப்பு மனப்பாங்கின் கலவையுடன், uStream இந்தியாவில் மட்டும் அல்லாமல் உலகம் முழுவதிலும் உள்ள திரைப்படத் தயாரிப்பாளர்களுக்கான ஒரு மகிழ்ச்சியான கலங்கரை விளக்கமாகச் சுழன்று எரியும்.
uStream பற்றி
uStream, படைப்பாற்றல் பணிகளை முழுமையாகச் செயல்படுத்தும் மெய்நிகர் தயாரிப்பு ஸ்டூடியோ (Virtual Production Studio). திரைப்படத் தயாரிப்பாளர்களுக்கு தீவிரப்படுத்தப்பட்ட XR தீர்வுகளை அளிக்கிறது. ஸ்டூடியோ பல்வேறு திரைச்செயல்பாடுகளை வழங்குகிறது. Al மூலம் மேம்படுத்தப்பட்ட Previz, கலை மற்றும் வடிவமைப்புச் செயல்பாடுகள், மெய்நிகர் உடைமை மேம்பாடு, VFX, DI (டிஜிட்டல் இடைநிலை) ஆகியவை உள்ளடங்கும். uStream Labs மூலமாக, புதிய தலைமுறை மெய்நிகர் தயாரிப்புத்திறமைகளை (Virtual Production Talent) வளர்ப்பதற்கான பயிற்சித் திட்டங்களையும் வழங்குகிறது. தற்போதைய LED சுவர் தொழில்நுட்பம், camera-to-cloud வேலைப்பொறி, விரிவுபடுத்தக்கூடிய பிந்தைய தயாரிப்பு தீர்வுகளைப் பயன்படுத்தி, உள்ளூர் மற்றும் பன்னாட்டுத் தயாரிப்புகளுக்கான திளைப்பூட்டும், உயர்தர மெய்நிகர்ச் சூழல்களை மகிழ்ச்சியுடனும் மதிப்பார்ந்த பெருமைகளுடனும் வழங்குகிறது.
- உலக செய்திகள்
- |
- சினிமா
