Review :

காவல்துறை தடவியல் நிபுணரான அமலா பால் தொடர்ச்சியாக மருத்துவர்கள் கொலைசெய்யப்படுவதை ஆராய்ந்து கொலையாளி ஒரே நபர் தான் என்பதை  தடவியல் மூலம் கண்டுபிடிக்கிறார். கொலையாளியை கண்டுபிடிக்க  நேரடியாக களத்தில் இறங்க பல அதிர்ச்சிகரமான உண்மைகள் தெரிய வருகிறது. கொலையாளி யார்? கொலைக்கான காரணம் என்ன ?  என்பதுதான் "கடாவர்" படத்தின் கதை. 

தடவியல் நிபுணர் கதாப்பாத்திரத்தில் நடித்திருக்கும் அமலா பால், பாய்ஸ் கட்டிங், கண்ணாடி, நெற்றியில் விபூதி என வித்தியாசமாக காட்சியளிக்கிறார். தனது உருவத்தில் மட்டும் இன்றி நடிப்பிலும் வித்தியாசத்தை காட்டியிருக்கிறார்.

கதையின் மையப்புள்ளியாக நடித்திருக்கும் அதுல்யா ரவி, தனது துடிதுடிப்பான நடிப்பு மூலம் கவனம் பெறுவதோடு, தனது மரணம் மூலம் பதறவும் வைக்கிறார். 

காவல்துறை அதிகாரியாக நடித்திருக்கும் ஹரிஷ் உத்தமன், அதுல்யாவின் கணவராக நடித்திருக்கும் திரிகுன், அமலா பாலின் உதவியாளராக வரும் வினோத் சாகர், முனிஷ்காந்த், ரித்விகா சிங் என படத்தில் வரும் அனைத்து நடிகர்களும் கதாப்பாத்திரங்களுக்கு ஏற்ற தேர்வாக இருப்பதோடு, கதையோடு பயணிக்கும் கதாப்பாத்திரங்களாகவும் இருக்கிறார்கள்.

ஒளிப்பதிவாளர் அரவிந்த் சிங்கின் கேமரா திரில்லர் படங்களுக்கு ஏற்றவாறு பயணித்திருப்பதோடு, உடல் தடவியல் பரிசோதனை காட்சிகளை உண்மையாக நடப்பது போலவே காட்சிப்படுத்தி ஆச்சரியமூட்டுகிறது. அதிலும் அதுல்யா ரவியின் புதைத்த உடலை மீண்டும் தோண்டி எடுப்பது, தடவியல் பரிசோதனை செய்யும் காட்சிகளில் வியக்க வைத்திருக்கிறார்.

ரஞ்சின் ராஜின் இசையில் பாடல்கள் இனிமையாக இருக்கிறது. சோகமான சூழ்நிலையில் ஒலிக்கும் பாடல்கள் கூட கேட்பதற்கு சுகமாக இருக்கிறது. அளவான பின்னணி இசை மூலம் கவனிக்க வைத்திருக்கிறார்.

மருத்துவத்துறையில் நடக்கும் குற்ற சம்பவத்தை சுற்றி கதை நகர்கிறது. ஏற்கனவே பல படங்களில் பேசப்பட்ட கரு என்பதால், சற்று வித்தியாசமாக காட்சிகளை தொகுத்திருக்கிறார் படத்தொகுப்பாளர் சான் லோகேஷ். ஆனால், அவை சட்டென்று புரியும்படி இல்லாமல், தலையை சுத்தி மூக்கை தொடுவது போல் இருக்கிறது.

"கடாவர்" படத்திற்கு மதிப்பீடு 3/5

Verdict : ரசிகர்களை ரசிக்க வைக்கும் த்ரில்லர் படம்.