Review :

"மைலாஞ்சி" அஜயன் பாலா இயக்கத்தில் அஜய் அர்ஜுன் புரொடக்ஷன்ஸ் - டாக்டர். அர்ஜுனன் தயாரிப்பில் உருவாகியிருக்கும் இந்த படத்திற்கு இசை இளையராஜா. இந்த படத்தில் ஸ்ரீராம் கார்த்திம், கிரிஷா குரூப், முனீஷ்காந்த், சிங்கம்புலி மற்றும் பலர் நடித்துள்ளனர். 

ஊட்டியில் ‘மைலாஞ்சி’ என்ற பெயரில் பறவைகள் பூங்கா நடத்தும் கிரிஷா குரூப், தன் விருப்பமில்லாத திருமணத்தில் இருந்து தப்பிக்க ஒரு இளைஞரை காதலிக்கிறார். ஆனால் அவர் சென்னைக்கு சென்று விடுகிறார். அதற்கிடையில், வனவிலங்கு புகைப்படக் கலைஞரான ஸ்ரீராம் கார்த்திக் ஊட்டிக்கு வருகிறார். அவர்களுக்குள் நட்பு உருவாகி, அது மெதுவாக காதலாக மாறுகிறது.

ஆனால் கிரிஷா, தன் பழைய காதலை மறக்காமல், ஸ்ரீராம் கார்த்திக்கிடம் அந்த இளைஞரை தேடி சேர்த்துவைக்கச் சொல்கிறார். அவளை காதலித்திருந்தாலும், அவளது விருப்பத்திற்காக முயற்சி செய்யும் நாயகன், பின்னர் உண்மை உணர்வுகள் வெளிப்படும் போது வலியுடன் விலகுகிறார். இறுதியில் யார் யாருடன் சேர்கிறார்கள் என்பதே "மைலாஞ்சி"  படத்தின் கதை.

ஸ்ரீராம் கார்த்திக், அமைதியான காதலனாக தனது வேலையை நன்றாக செய்துள்ளார். உணர்வுபூர்வமான காட்சிகளில் அளவான நடிப்பால் கவனம் ஈர்க்கிறார்.

கிரிஷா குரூப், இளம் பெண்ணின் குழந்தைத்தனமான மனநிலையை காட்ட முயற்சித்துள்ளார். ஆனால் அவரது கதாபாத்திரம் முழுமையாக பார்வையாளர்களை கவரவில்லை.  

முனீஷ்காந்த் மற்றும் சிங்கம்புலி இணையும் நகைச்சுவை காட்சிகள் எதிர்பார்த்த அளவுக்கு சிரிப்பை ஏற்படுத்தவில்லை.

அதே நேரத்தில், நாயகனின் அம்மாவாக நடித்திருக்கும் செந்தி, நாயகியின் சித்தியாக வரும் நடிகை, மாமனாக நடித்திருக்கும் கலையரசன் கன்னுசாமி உள்ளிட்ட மற்ற துணை நடிகர்கள் தங்களுக்கு வழங்கப்பட்ட வேடங்களை முறையாக செய்துள்ளனர். அவர்கள் பெரிதாக மிளிராதிருந்தாலும், கதை ஓட்டத்திற்கு ஏற்ப சரியாக தங்களுடைய பங்களிப்பை தந்துள்ளனர். 

ஒளிப்பதிவாளர் செழியன் படத்திற்கு மிகப்பெரிய பலம். பசுமை நிறைந்த ஊட்டியை அழகாக படம்பிடித்து, காதல் காட்சிகளை கவிதைபோல் காட்டியுள்ளார்.

இசையில் இளையராஜா பாடல்கள் பெரிய தாக்கம் இல்லாவிட்டாலும், மென்மையான உணர்வை தருகின்றன. பின்னணி இசை இனிமையாக உள்ளது.

படத்தொகுப்பாளர் ஸ்ரீகர் பிரசாத் கதை மெதுவாக நகர்ந்தாலும், அதை சீராக வைத்திருக்க முயற்சித்துள்ளார்.

இயக்குநர் அஜயன் பாலா காதல் உணர்வுகளை மென்மையாக சொல்ல முயற்சித்துள்ளார். சில காட்சிகள் அழகாக இருந்தாலும், கதை இன்றைய காலத்துக்கு ஏற்ற புதுமை இல்லாமல் பழைய பாணியில் நகர்வது குறையாக தோன்றுகிறது.

மொத்தத்தில் ‘மயிலாஞ்சி’ மெதுவாக நகரும், உணர்ச்சி மிக்க காதல் படம். வேகமான திருப்பங்கள் இல்லாமல், அமைதியான காதல் கதையை ரசிப்பவர்களுக்கு இது பொருத்தமான படம்.

"மைலாஞ்சி" படத்திற்கு மதிப்பீடு 2.5/5

Verdict : ரசிக்க பொறுமை தேவை