Review :

‘வெஞ்சென்ஸ்" ராகுல் அசோக் இயக்கத்தில் Ac புரொடக்ஷன்ஸ் - A.P. அசோக் குமார் தயாரித்திருக்கும் இந்த படத்திற்கு இசை கார்த்திக் ராஜா. இந்த படத்தில் அபர்ணதி, இளவரசு, ஜான் விஜய், காளி வெங்கட், லிவிங்ஸ்டன், ஒய்.ஜி.மகேந்திரன், சரவண சுப்பையா, டி.எம்.கார்த்தி, சுரேஷ் சக்கரவர்த்தி, நோபல் கே.ஜேம்ஸ், சச்சு, மங்கல், சாய் தன்யா, ரேகா நாயர், சிறுமி சம்யுக்தா மற்றும் பலர் நடித்துள்ளனர். 

2042-ஆம் ஆண்டை பின்னணியாகக் கொண்டு இந்த கதை அமைக்கப்பட்டுள்ளது, சிறுவயதிலிருந்தே மக்கள் தன்னை பற்றி பேச வேண்டும் என்ற ஆசை கொண்டவராக அபர்ணதி காட்டப்படுகிறார். அந்த எண்ணத்துடன் கடுமையாக உழைத்து 10-ஆம் வகுப்பு பொதுத்தேர்வில் மாநிலத்தில் முதலிடம் பெறுகிறார். ஆனால் அந்த புகழ் சில நாட்களில் மறைந்து விடுகிறது. இதனால், தொடர்ந்து அனைவரின் கவனத்திலும் இருக்க வேண்டும் என்ற எண்ணத்தில் சில அதிர்ச்சியூட்டும் செயல்களில் அவர் ஈடுபடுகிறார்.

பின்னர் வளர்ந்து மாவட்ட ஆட்சியராக பொறுப்பேற்கும் அபர்ணதி, தனது அதிகாரத்தையும் செயல்களையும் பயன்படுத்தி மக்கள் கவனத்தை ஈர்க்க முயற்சிக்கிறார். அந்த நேரத்தில் முதலமைச்சர் அவருக்கு தடையாக நிற்கிறார். அந்த தடையை உடைக்க முயலும் அபர்ணதி, ஒரு கட்டத்தில் முதலமைச்சரே தன் முடிவுகளை ஏற்றுக்கொள்ள வேண்டிய நிலைக்கு முன்னேறுகிறார். ஆனால் அவரது முன்னேற்றத்துடன் எதிர்ப்புகளும் அதிகரிக்கின்றன. அவற்றை தனது புத்திசாலித்தனத்தாலும் தைரியத்தாலும் சமாளித்து வெற்றி பெறும் கதையாகவே ‘வெஞ்சென்ஸ்’ நகர்கிறது.

நாயகியாக நடித்துள்ள அபர்ணதி, தைரியம் மற்றும் அறிவு நிறைந்த அதிகாரி கதாபாத்திரத்தை நன்றாக வெளிப்படுத்தியுள்ளார். கூர்மையான பார்வை, தன்னம்பிக்கை கொண்ட பேச்சு, உறுதியான செயல்கள் ஆகியவற்றின் மூலம் கதாபாத்திரத்தை வலுவாக காட்டியிருக்கிறார். 

முதலமைச்சர் வேடத்தில் நடித்துள்ள இளவரசு, மத்திய அமைச்சராக வரும் ஜான் விஜய், அபர்ணதியின் தந்தையாக நடித்துள்ள காளி வெங்கட், எதிர்க்கட்சித் தலைவராக வரும் லிவிங்ஸ்டன், முன்னாள் முதலமைச்சராக வரும் ஒய்.ஜி. மகேந்திரன், அமைச்சராக வரும் சரவண சுப்பையா ஆகியோரின் கதாபாத்திரங்கள் தமிழ்நாடு அரசியலை நினைவூட்டும் விதமாக அமைந்துள்ளன.

டி.எம். கார்த்தி, சுரேஷ் சக்கரவர்த்தி, நோபல் கே. ஜேம்ஸ், சச்சு, மங்கல், சாய் தன்யா, ரேகா நாயர், சிறுமி சம்யுக்தா உள்ளிட்டோர் தங்களுக்குக் கிடைத்த வேடங்களை சரியாக செய்திருக்கிறார்கள்.

எம்.எஸ். பிரபு ஒளிப்பதிவு படத்திற்கு அழகான தோற்றத்தை கொடுக்கிறது. குறிப்பாக கதாநாயகியின் உணர்வுகளை நெருக்கமான காட்சிகளின் மூலம் நன்றாக வெளிப்படுத்தியுள்ளார். கார்த்திக் ராஜா இசையில் பாடல்கள் மற்றும் பின்னணி இசை காட்சிகளின் உணர்வை உயர்த்துகிறது. இம்ரான் செய்த படத்தொகுப்பு கதையை தெளிவாகவும் சீராகவும் நகர்த்துகிறது.

ஒரு பெண்ணின் பழிவாங்கும் எண்ணமும், புகழைப் பெற வேண்டும் என்ற ஆசையும் கதையின் மையமாக வைத்து, தமிழ்நாடு அரசியல் சம்பவங்களை திரைக்கதையாக மாற்றியுள்ளார் இயக்குநர் ராகுல் அசோக். சில அரசியல் உண்மைகளை துணிச்சலாக காட்சிப்படுத்தியிருப்பதும் கவனம் ஈர்க்கிறது. மாநில அரசியல் முதல் மத்திய அரசியல் வரை பல அம்சங்களை படத்தில் இணைத்து முழுமையான அரசியல் படமாக உருவாக்கியுள்ளார்.

படத்தின் முதல் பாதி வேகமாகவும் சுவாரஸ்யமாகவும் நகர்கிறது. ஆனால் இரண்டாம் பாதியில் வரும் சில காட்சிகள் எதிர்பார்த்த அளவுக்கு தாக்கம் ஏற்படுத்தாமல் சற்று மெதுவாக தோன்றுகின்றன. இருந்தாலும் அரசியல் பின்னணி மற்றும் கதையின் மையக்கரு காரணமாக படம் மீண்டும் சுவாரஸ்யத்தைப் பெறுகிறது. மொத்தத்தில் அரசியல் கலந்த சஸ்பென்ஸ் கதையாக ‘வெஞ்சென்ஸ்’ கவனிக்கத்தக்க படமாக உள்ளது.

"வெஞ்சென்ஸ்" படத்திற்கு மதிப்பீடு 3/5

Verdict : அரசியல் கலந்த சஸ்பென்ஸ் கதை