சற்று முன்
சினிமா செய்திகள்
சகல பிணி தீர்க்கும் சஞ்சீவினி தீர்த்த திருமஞ்சனம்! - தன்வந்திரி பீடத்தில் நாளை நடக்கிறது
Updated on : 14 February 2019
வேலூர் மாவட்டம் வாலாஜாபேட்டை ஸ்ரீ தன்வந்திரி ஆரோக்ய பீடத்தில், ஸ்தாபகர் மற்றும் பீடாதிபதி “யக்ஞஸ்ரீ கயிலை ஞானகுரு” டாக்டர் முரளிதர ஸ்வாமிகள் ஆசிகளுடன் ஏகாதசி திதியை முன்னிட்டு வருகிற 15.02.2019 வெள்ளிக்கிழமை காலை10.00 மணி முதல் 1.00 மணி வரை பிணி தீர்க்கும் ஸ்ரீ தன்வந்திரி பெருமாளுக்கு சகல விதமான பிணி தீர்க்கும் அமிர்த சஞ்சீவினி யாகத்திகழும் நெல்லிக்காய் பொடியை கொண்டு சிறப்பு திருமஞ்சனம் நடைபெற உள்ளது.
நெல்லிப்பொடியின் மருத்துவ பயன் : நெல்லிக்காய் பொடி உடல் உஷ்ணத்தை குறைத்து, மூளைக்கு குளிர்ச்சியையும், ஞாபகச் சக்தியையும் அளித்து, உடலுக்கும் குளிர்ச்சியைத் தருபவையாகும். கோடை காலங்களில் நமக்குப் பொதுவாகவே ஏற்படக்கூடிய தாகம், நா வறட்சி, மயக்கம், வாந்தி மற்றும் அஜீரணம் ஆகியவற்றிற்கு நெல்லிக்காய் அருமருந்தாகும். தவிர ஆயுள் விருத்திக்கும் சஞ்சீவி போன்றதாகும். தேக ஆரோக்கியத்திற்கு மிகவும் உகந்ததாகும். நீரிழிவை நீக்கும் இயல்பு உண்டு. மேலும் நெல்லியில் உடலுக்கு அவசியமான பாஸ்பரஸ், அயர்ன், கால்சியம் முதலியவை அதிக அளவில் உள்ளதால் உடலுக்கு வலிமை கிடைக்கின்றது. இரத்த விருத்தியையும் கொடுக்க கூடியவை.
சிறுநீரகக் கோளாறு, இரத்தச் சோகை, மஞ்சள் காமாலை மற்றும் அஜீரண நோய்களுக்கு நல்ல மருந்தாகிறது. சர்க்கரை நோயாளியின் கணையத்தை வலுவேற்ற உதவும். மூப்பினை ஏற்படுத்தும் தொல்லைகளைப் போக்கி, உடல் உறுப்புகளை நல்ல நிலையில் வைக்கும் திறன் படைத்தது.வாழ்நாளை நீடிக்கச் செய்யும் காயகல்ப மூலிகையாகும்.
நெல்லிக்காயில் புரதம், கொழுப்பு, கரிச்சத்து, சுண்ணாம்புச் சத்து, தாதுப்பொருள், இரும்பு, நிக்கோடினிக் அமிலம் முதலியவை அடங்கியுள்ளன. இரத்தத்தில் கொலஸ்டிரால் படிதலை வைட்டமின் ‘சி’ தடுக்கிறது. இரத்தத்தில் சேரும் யூரிக் அமிலத்தை நெல்லிக்காய் விலக்குகிறது. பொதுவில் வாதமும் சமப்பட்டு விடுகிறது.மனித உடல் முழுவதும் பரவி, ஆரோக்கியமும், நீண்ட ஆயுளும் நெல்லிக்காய் தருகிறது. இது இதயத்திற்கு வலிமையை வழங்குகிறது. மற்றும் குடற்புண், இரத்தப்பெருக்கு, நீரிழிவு, கண் நோய் ஆகியவற்றைக் குணமாக்கும்.
தன்வந்திரி மந்திரம்:
ஓம் நமோ பகவதே வாஸூதேவாய தந்வந்த்ரயே
அம்ருத கலசஹஸ்தாய ஸர்வ ஆமய விநாசநாய
த்ரைலோக்ய நாதாய ஸ்ரீ மஹாவிஷ்ணவே நம:
ஸ்ரீ தன்வந்திரி பெருமாளின் மகிமை : ஒரு மனிதன் தேகம் ஆரோக்கியத்துடன் இருந்துவிட்டால் தான், மற்ற எல்லா வேலைகளையும் திறம்படச் செய்யமுடியும். தவிர, உடல் உழைப்புக்கு மட்டுமின்றி, உடலில் எந்த நோயும் இல்லாமல் இருப்பது மிகப்பெரிய பலம். எனவே தன்வந்திரி பகவானை மனதில் நிறுத்தி, வழிபடுவது மிகவும் நல்ல பலன் தரும். பிறப்பும், இறப்பும் பூமியில் வாழும் அனைத்து உயிர்களுக்கும் பொதுவான இயற்கையின் நீதியாகும். அதிலும் மனிதர்கள் பிறந்தது முதல் வாழ்வில் பலவிதமான சூழ்நிலைகளை எதிர்கொள்ள ஒருவர் இவ்வுலகில் சிறப்பாக வாழ செல்வம் எவ்வளவோ முக்கியமோ அதே அளவிற்கு நோய்களின் பாதிப்பிற்குள்ளாகாத திடமான ஆரோக்கியமும், உடல்நிலையும் அவசியமாகும். இந்து மதத்தில் நோய்களை நீக்கும் தெய்வமாக “தன்வந்திரி பகவான்” கருதப்படுகிறார். இவர் தேவர்கள் மற்றும் அசுரர்கள் சாகாநிலை தரும் அமிர்தத்தை பெற பாற்கடலை கடைந்தவர். மனிதர்கள், தேவர்கள் பயன்பெற அமிர்த கலசம் மற்றும் நோய்களை போக்கும் பல மருத்துவ மூலிகைகளுடன் தோன்றினார். நோய்களை போக்கி, உடல்நலத்தை காக்கும் மூலிகைகளை உலகத்தாரின் பயன்பாட்டிற்கு வெளிக்கொணர்ந்ததால் தன்வந்திரி பகவான் மருத்துவ கடவுளாக வணங்கப்படுகிறார்.
வாலாஜாபேட்டை, ஸ்ரீ தன்வந்திரி பீடம் : வேலூர் மாவட்டம், வாலாஜாபேட்டை, அனந்தலை மதுர, கீழ்புதுப்பேட்டையில்மேற்கண்ட சிறப்புகள் வாய்ந்த மருத்துவ கடவுளான ஸ்ரீ தன்வந்திரி பகவானுக்கு 46 லக்ஷம் பக்தர்கள் கைப்படை எழுதிய 54 கோடி தன்வந்திரி மந்திரங்களை கொண்டு 9 அடி உயரத்தில் 15 ஆண்டுகளுக்கு முன்பாக பிரதிஷ்டை செய்துள்ள தன்வந்திரி பகவானுக்கு வருகிற 15.02.2019 வெள்ளிக்கிழமை ஏகாதசி திதியை முன்னிட்டு சகல விதமான பிணி தீர்க்கும் அமிர்த சஞ்சீவினி யாகத்திகழும் நெல்லிக்காய் பொடியை கொண்டு சிறப்பு திருமஞ்சனம் காலை 10.00 மணி முதல் 1.00 மணி வரை நடைபெற உள்ளது. பக்தர்கள் அனைவரும் சிறப்பு வைபவத்தில் கலந்துகொண்டு பயன்பெற வேண்டுகிறோம்.
இதில் பங்கேற்க விரும்புபவர்கள் நெல்லிக்காய் பொடி, மூலிகைகள், அபிஷேக திரவியங்கள், வாசனாதி திரவியங்கள், பசுநெய்,வெல்லம், சுக்கு, மிளகு, திப்பிலி, நல்லெண்ணை, பழங்கள், புஷ்பங்கள், வஸ்திரங்கள், நிவேதன பொருட்கள், கொடுத்து பக்வத் கைங்கர்யத்தில் பங்கேற்று தன்வந்திரி பகவான் அருளுடன் நீண்ட ஆயுள் பெற அன்புடன் அழைக்கின்றோம். இந்த தகவலை தன்வந்திரி குடும்பத்தினர் தெரிவித்தனர்.
சமீபத்திய செய்திகள்
அமீர் கான், ஜெனிலியா தேஷ்முக்குடன் 10 புதுமுக மாற்றுத்திறனாளிகள் நடித்துள்ள படம் YouTube-இல்!
திரைப்படங்களை அனைவரும் எளிதாக பார்க்கக்கூடிய வகையில், அதிரடியான புதிய முயற்சியாக, அமீர் கான் அவரது நடிப்பில், சமீபத்தில் வெளியாகி வெற்றி பெற்ற திரைப்படமான “சித்தாரே ஜமீன் பர்” திரைப்படத்தை, YouTube-இல் Movies-on-Demand முறையில் வெளியிடுகிறார். இதன் மூலம் உலகம் முழுவதும் உள்ள பார்வையாளர்கள் மிகக் குறைந்த விலையில், திரைப்படத்தை பார்த்து மகிழ முடியும்.
இந்த புதிய அதிரடி முயற்சி, உலகளாவிய அளவில் திரைப்பட விநியோகத்தில் ஒரு புதிய வழிகாட்டியாகும். “சித்தாரே ஜமீன் பர்” திரைப்படத்தை YouTube-இல் மட்டுமே பார்க்க முடியும், வேறெந்த டிஜிட்டல் பிளாட்ஃபாரங்களிலும் இப்படத்தை காண முடியாது.
அமீர் கான் இன்று தனது சூப்பர்ஹிட் திரைப்படமான “சித்தாரே ஜமீன் பர்” திரைப்படத்தின் உலகளாவிய டிஜிட்டல் வெளியீட்டை, ஆகஸ்ட் 1, 2025 முதல் YouTube-இல் பிரத்தியேகமாக வெளியிடுவதாக அறிவித்துள்ளார். இந்த புதிய அதிரடி நடவடிக்கை, 2025 இன் மிகவும் வெற்றிகரமான திரையரங்க வெளியீடுகளில் ஒன்றை, நேரடியாக மக்களின் வீடுகளுக்கு வழங்கும் ஒரு துணிச்சலான புதிய விநியோக அணுகுமுறையைக் குறிக்கிறது. நடிகர்-தயாரிப்பாளர் அமீர் கான், ஜெனிலியா தேஷ்முக்குடன் 10 புதுமுக மாற்றுத்திறனாளிகள் இணைந்து நடித்துள்ள இந்த மனதைக் கவரும் குடும்ப பொழுதுபோக்கு திரைப்படம், இந்தியாவில் ரூ. 100 விலையிலும், அமெரிக்கா, கனடா, இங்கிலாந்து, ஆஸ்திரேலியா, ஜெர்மனி, இந்தோனேசியா, பிலிப்பைன்ஸ், சிங்கப்பூர், ஸ்பெயின் உள்ளிட்ட 38 சர்வதேச நாடுகளில், அவர்கள் நாட்டின் சந்தைக்கேற்ற விலையிலும் கிடைக்கும்.
2007 ஆம் ஆண்டு வெளிவந்த 'தாரே ஜமீன் பர்' திரைப்படத்தின் சீக்குவலாக உருவான அமீர் கானின் 'சித்தாரே ஜமீன் பர்' திரைப்படம், அசத்தலான ஸ்போர்ட்ஸ் டிராமாவாக, அனைவராலும் கொண்டாடப்பட்டது. உலகளவில் ₹250 கோடி வசூலைக் குவித்து சாதனை படைத்தது. பார்வையாளர்கள் இப்போது கட்டணம் செலுத்தி, படத்தை Movies on Demand இல் எடுத்து, ஒவ்வொரு வீட்டையும் ஒரு தியேட்டராக மாற்றலாம்.
இது பிரீமியம் சினிமாவை பரந்த பார்வையாளர்களுக்கு, அவர்கள் வீட்டிலோ அல்லது பயணத்திலோ அணுகக்கூடியதாக ஆக்குகிறது - அவர்களுக்குத் தேவையானது இணைய இணைப்பு மட்டுமே. திரையரங்குகளில் தவறவிட்ட அல்லது மீண்டும் பார்க்க விரும்பும் ரசிகர்களுக்கு, இது உயர்தர, வசதியான விருப்பத்தை வழங்குகிறது. இந்தியாவிலும் உலகளவில் இன்னும் பரந்த மற்றும் புதிய பார்வையாளர்களை அடைய, “சித்தாரே ஜமீன் பர்” முக்கிய மொழிகளில் வசன வரிகள் மற்றும் டப்பிங் சேவைகளையும் வழங்கும்.
இந்த முயற்சியின் சிறப்பம்சங்கள்:
இணையம் இருந்தாலே போதும் – எங்கு வேண்டுமானாலும், எப்போது வேண்டுமானாலும் பார்க்கலாம். திரையில் பார்த்தவர்கள் மீண்டும் பார்ப்பதற்கும், மிஸ் செய்தவர்கள் இப்போது அனுபவிப்பதற்கும் அரிய வாய்ப்பாக அமைந்துள்ளது. தமிழுடன் பல முக்கிய மொழிகளில் வசனங்கள் (Subtitles) மற்றும் டப்பிங் வசதி வழங்கப்படுகிறது. Aamir Khan Productions-இன் பல படங்களும் எதிர்காலத்தில் YouTube-இல் இதே மாதிரியான முறையில் வெளியாகும்.
இந்த முக்கிய அறிவிப்பு, YouTube, அணுகலை ஜனநாயகப்படுத்துவதிலும், விநியோக உத்திகளை உருவாக்குவதிலும், சீரியலுக்கு பின்னால் திரைப்படம் மற்றும் ஊடக உள்ளடக்கத்திற்கான முதன்மையான இடமாக YouTubeஐ நிறுவுவதிலும், டிஜிட்டல் உலகில் அதன் வளர்ந்து வரும் பங்கையும் நிரூபிக்கிறது. இந்தியாவிலும் உலக அளவிலும் YouTubeஐ பயன்படுத்துவது மிக எளிதான மகிழ்ச்சியான அனுபவமாக உள்ளது. காம்ஸ்கோரின் கூற்றுப்படி, 18 வயதுக்கு மேற்பட்டவர்களில் இந்தியாவில் 5 இணைய பயனர்களில் 4 பேரை YouTube அடைந்துள்ளது, அதே நேரத்தில் YouTube இல் பொழுதுபோக்கு வீடியோக்கள் 2024 ஆம் ஆண்டில் உலகளவில் தினசரி 7.5 பில்லியனுக்கும் அதிகமான பார்வைகளைப் பெற்றுள்ளது.
இந்த திரைப்பட வெளியீடு குறித்து நடிகர்-தயாரிப்பாளர் அமீர் கான் கூறுகையில்..,
"கடந்த 15 ஆண்டுகளாக திரையரங்குகளுக்கு வராத பார்வையாளர்களை அல்லது பல்வேறு காரணங்களுக்காக திரையரங்குகளுக்குள் நுழைய முடியாதவர்களை எவ்வாறு சென்றடைவது என்ற சவாலில் நான் போராடி வருகிறேன். இறுதியாக அதற்கு மிகசரியான நேரம் வந்துவிட்டது. நமது அரசாங்கம் UPI-ஐ கொண்டு வந்தவுடன், மின்னணு கட்டணங்களில் இந்தியா உலகில் முதலிடத்தைப் பிடித்தது, இந்தியாவில் இணைய ஊடுருவல் வியத்தகு முறையில் வளர்ந்து வருகிறது, மேலும் பெரும்பாலான சாதனங்களில் YouTube இருப்பதால், இந்தியாவில் பரந்த அளவிலான மக்களையும், உலகின் ஒரு குறிப்பிடத்தக்க பகுதியையும் நாம் இறுதியாக சென்றடைய முடியும். சினிமா அனைவருக்கும் நியாயமான மற்றும் மலிவு விலையில் சென்றடைய வேண்டும் என்பதே எனது கனவு. மக்கள் எப்போது வேண்டுமானாலும், எங்கு வேண்டுமானாலும் சினிமாவைப் பார்ப்பதற்கான வசதி கிடைக்க வேண்டுமென நான் விரும்புகிறேன். இந்த யோசனை வெற்றி பெற்றால், புவியியல் மற்றும் பிற தடைகளைத் தாண்டி படைப்பாற்றல் மிக்க குரல்கள் வெவ்வேறு கதைகளைச் சொல்ல முடியும். சினிமா துறையில் நுழையும் இளைய படைப்பாளிகளுக்கு இது ஒரு சிறந்த வாய்ப்பாகவும் இருக்கும். இதை அனைவருக்குமான வெற்றியாக நான் பார்க்கிறேன்."
YouTube India இயக்குநர் குஞ்ஜன் சோனி கூறியதாவது…
"சித்தாரே ஜமீன் பர் திரைப்படத்தை YouTube இல் பிரத்தியேகமாக டிஜிட்டல் முறையில் வெளியிடுவது, இந்திய திரைப்பட விநியோகத்தை உலக அளவில் ஜனநாயகப்படுத்துவதற்கான ஒரு குறிப்பிடத்தக்க படியை, அடிக்கோடிட்டுக் காட்டுகிறது. YouTube ஏற்கனவே பிரீமியம் உள்ளடக்கத்திற்கான ஒரு முக்கிய டிஜிட்டல் இலக்காக உள்ளது, மேலும் திரைப்பட தயாரிப்பாளர்கள் மற்றும் உள்ளடக்க உரிமையாளர்களுக்கு எங்கள் இணையற்ற டிஜிட்டல் அணுகலை மட்டுமல்லாமல், அவர்கள் இருக்கும் இடத்தில் தங்கள் பார்வையாளர்களைச் சந்திக்க கட்டுப்பாடு மற்றும் நெகிழ்வுத்தன்மையையும் வழங்குவதில் நாங்கள் மகிழ்ச்சியடைகிறோம். இன்றைய வெளியீடு ஒரு வெளியீடாக மட்டுமல்லாமல் - இந்திய சினிமா உலக அரங்கில் முன்னேற YouTube சிவப்பு கம்பளம் விரிக்கிறது."
பிரபலமான இந்திய மற்றும் சர்வதேச ஹிட் திரைப்படங்கள் உட்பட பல்வேறு மொழிகள், வகைகள், திரைப்படங்களை வாங்க அல்லது வாடகைக்கு எடுக்கும் வகையில், YouTube ஏராளமான திரைப்படங்களை வழங்குகிறது. இணைய ஊடுருவல், இணைக்கப்பட்ட தொலைக்காட்சிகளில் விரைவான வளர்ச்சி மற்றும் அதிகரித்து வரும் மொபைல் நுகர்வு ஆகியவற்றால் இயக்கப்படும் இந்தியாவில் குறிப்பிடத்தக்க வாய்ப்புடன் இந்த சலுகை தொடர்ந்து வளர்ந்து வருகிறது. உண்மையில், இணைக்கப்பட்ட தொலைக்காட்சி (CTV) இந்தியாவில் கடந்த 5 ஆண்டுகளாக YouTube இன் வேகமாக வளர்ந்து வரும் திரையாகும். பிரீமியம் உள்ளடக்கத்தை ஒவ்வொரு திரையிலும் ஒவ்வொரு வடிவத்திலும் அணுகக்கூடியதாக மாற்றுவதற்கான YouTube இன் தனித்துவமான நிலையை இந்தப் போக்குகள் வலுப்படுத்துகின்றன.
டீஸர்கள், டிரெய்லர்கள் மற்றும் இசையுடன் ஆரம்ப பரபரப்பை ஏற்படுத்துவது முதல், இப்போது தடையற்ற ஆன்-டிமாண்ட் ஸ்ட்ரீமிங் வரை விரிவடைந்து வரும் ஒரு திரைப்படத்தின் முழு பயணத்திலும் இந்த தளம் ஒரு முக்கியமான மற்றும் தொடர்ச்சியான பகுதியாகும். காந்தார் கணக்கெடுப்பின்படி, இந்தியாவில் பார்வையாளர்கள் பொழுதுபோக்குத் துறையில் புதிய வாங்குதல்களைக் கருத்தில் கொள்ளும்போது பெரும்பாலும் YouTube இல் வீடியோக்களைப் பார்க்கிறார்கள், மேலும் YouTube இசையில் (94%) மற்றும் பொழுதுபோக்கு (94%) ஆகியவற்றில் சிறந்த உள்ளடக்கத்தைக் கொண்டுள்ளது என்பதை ஒப்புக்கொள்கிறார்கள். பார்வையாளர்கள் அதிக பங்கேற்பாளர்களாக மாறும்போது, YouTube இல் உள்ள ரசிகர்கள் உள்ளடக்கத்தில் சிறப்பானதை உருவாக்க உதவுகிறார்கள், இது திரைப்படத் தயாரிப்பாளர்களுக்கு ஈடுபாடு மற்றும் ஆர்வமுள்ள ரசிகர் கூட்டங்களை உருவாக்க அனுமதிக்கிறது.
திவி நிதி சர்மா எழுத்தில், அமீர் கான், ஜெனிலியா தேஷ்முக் நடிப்பில், பத்து புதிய முகங்களுடன் 'சித்தாரே ஜமீன் பர்' திரைப்படத்தை ஆர்.எஸ். பிரசன்னா இயக்கியுள்ளார். அடுத்து, சன்னி தியோல் மற்றும் பிரீத்தி ஜிந்தா நடிக்கும் 'லாகூர் 1947' படத்தையும், ஜுனைத் கான் மற்றும் சாய் பல்லவி நடிக்கும் 'ஏக் தின்' படத்தையும் தனது ஆமிர் கான் புரொடக்ஷன்ஸ் நிறுவனத்தின் கீழ் ஆமிர் கான் தயாரித்து வருகிறார்.
- உலக செய்திகள்
- |
- சினிமா
